Конда́к 1
Избра́нный подви́жниче и до́брый па́стырю, сла́вный учи́телю и про-
свети́телю, достоблаже́нне о́тче на́ш Иерофе́е! Почита́ем тя любо́вию и
похва́льная воспису́ем ти: ты бо в годи́ну лю ́ тую неотсту́пно пребыва́л еси́
ве́рным Христу́, неуста́нно и́стину благовествова́л еси́, в темни́цах су́щих
неле́ностно посеща́юще. Те́мже про́сим тя́: не преста́й моли́тися, помина́я чад
твои́х, да поми́лует и спасе́т Госпо́дь пою ́ щих ти́:
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Икос 1
Его́же возлюби́л еси́ всем се́рдцем Го́спода Иису́са, Тому́ поревнова́л еси́, до-
стобла́женне о́тче на́ш Иерофе́е, от ю ́ ности ве́ру Правосла́вную избра́л еси́,
благоче́стие и ве́рность Христу́ Бо́гу сохрани́л еси́, ра́зум от Исто́чника зна́ний
вода́ми му́дрости напая́юще. Вся́ сия́ труды ́ соде́лал еси́ ра́ди сла́вы Живо-
нача́льныя Тро́ицы, да обря́щеши бога́тство неиждива́емое. Сего́ ра́ди зове́м ти
сицева́я:
Ра́дуйся, роди́телей благочести́вых сы ́ не богоизбра́нный.
Ра́дуйся, до́браго воспита́ния цве́те благоуха́нный.
Ра́дуйся, измла́да нра́вом кро́тким ду́шу твою ́ украси́вый.
Ра́дуйся, изде́тска к моли́тве и послуша́нию прилежа́вый.
Ра́дуйся, чи́стое житие́ от ю ́ ности возлюби́вый.
Ра́дуйся, ве́ру и любо́вь в се́рдце свое́м возрасти́вый.
Ра́дуйся, вы ́ ю свою ́ во́ле Бо́жией подклони́вый.
Ра́дуйся, от лет ю ́ ных ум твой до́брым зна́нием обогати́вый.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 2
Раздира́ему ви́дяще Це́рковь от лати́нян, не убоя́лся еси́, Иерофе́е свяще́нне, но
благо́е и́го и бре́мя ле́гкое Христо́во всера́достно восприя́л еси́, еще́ же и ины ́ х
благонра́вию науча́юще. Те́мже и соверши́ тя Госпо́дь па́стыря ве́рна и кро́тка,
да упасе́ши о́вцы Его́. Сего́ ра́ди благода́рно взыва́ем Бо́гу: Аллилу́иа.
Икос 2
Отче пречу́дне, о душа́х чад Христо́вых усе́рдное попече́ние име́л еси́, те́х
огражда́я от ересе́й тлетво́рных и про́чиих мы ́ сленнаго во́лка ловле́ний,
наставле́ньми и уче́ньми твои́ми ве́ру и́стинную в их сердца́х насажда́л еси́.
Христиа́не боголюби́вии, ве́дуще тя о спасе́нии та́ко пеку́щагося, любо́вию во
умиле́нии пою ́ т тя си́це:
Ра́дуйся, моли́твы и воздержа́ния храни́телю.
Ра́дуйся, невозвра́тный Го́спода после́дователю.
Ра́дуйся, и́стиннаго богопочита́ния насади́телю.
Ра́дуйся, чистоты ́ ве́ры сла́вный блюсти́телю.
Ра́дуйся, благоче́стия христиа́нскаго рачи́телю.
Ра́дуйся, Це́ркви Бо́жией дерзнове́нный служи́телю.
Ра́дуйся, неуста́нный богому́дрый учи́телю.
Ра́дуйся, благода́тный наро́да просвети́телю.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 3
Фео́дора пресви́тера ча́до благонра́вное, изде́тска си́лу Бо́жию восприя́л еси́ и,
я́ко свети́льник многосве́тлый, возсия́л еси́, о́тче Иерофе́е, в годи́ну те́мную
Све́том Христо́вым просвеща́юще и освяща́юще зе́млю на́шу. Пре́жде прия́тия
чи́на а́нгельскаго уготова́н бы ́ л еси́, сла́вне, бы ́ ти вои́стину во́ином ду́ха,
мно́гими позна́ниями украси́вся, одаре́н мно́гими тала́нты от Архиере́я
гряду́щих бла́г Христа́, Ему́же при́сно пое́ши пе́снь ра́дования: Аллилу́иа.
Икос 3
Ели́ко возмо́жно, жела́ние ве́лие к непреста́нному восхожде́нию ле́ствицею
духо́вною име́л еси́, ра́зум и се́рдце твое́ славосло́вию Бо́га всеце́ло посвяти́л
еси́, послуша́ние и́стовое и зна́ния ве́лия стяжа́л еси́. Егда́ же на путь и́но-
ческаго де́лания стопы ́ своя́ напра́вил еси́, Иерофе́ем нарече́н быв, я́ко
вои́стину посвяще́н Бо́гу еси́, всесвяще́нне. Таково́му Промышле́нию о тебе́
дивя́щеся, восхваля́ем тя́:
Ра́дуйся, сосу́де чи́стый, Бо́гу всеце́ло посвяще́нный.
Ра́дуйся, свети́льниче Христо́в, му́дростию украше́нный.
Ра́дуйся, подви́жниче многотру́дне, зна́нием обогаще́нный.
Ра́дуйся, благода́тию Бо́жией приосене́нный.
Ра́дуйся, Го́спода Вы ́ шняго благогове́йный служи́телю.
Ра́дуйся, оби́тели Загае́цкия усе́рдный строи́телю.
Ра́дуйся, слове́с Бо́жиих пресла́вный учи́телю.
Ра́дуйся, а́нгельския чистоты ́ блюсти́телю.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 4
Ярость и треволне́ния мо́ря жите́йскаго, бра́ни же и гоне́ния лю ́ ди вверга́ше в
пучи́ну лю ́ тыя ско́рби. Ты же, свети́льник сый чистоты ́ и богоразу́мия,
Иерофе́е, вся́ сия́ благосе́рдно претерпе́л еси́. Егда́ же клеветы ́ ра́ди от по-
слуша́ния учи́тельскаго уво́лен бы ́ л еси непра́ведно, любвеоби́льне о́тче,
боле́знуя се́рдцем, со ученики́ приле́жными и духо́вными ча́ды твои́ми Христу́
Бо́гу кро́тко сла́ву воздава́л еси́, пою ́ ще те́пле: Аллилу́иа.
Икос 4
Хра́ма благоле́пие, я́ко ме́сто селе́ния сла́вы Бо́жия, все́м се́рдцем возлюби́вый,
вве́ренней ти оби́тели Загае́цстей зе́мли труды ́ твои́ми возврати́вый,
безбо́жных лати́нян па́ки посрами́вый, о́тче свяще́нне Иерофе́е, со смире́нием
кре́ст тво́й поне́сл еси́, нау́ками мно́гими ра́зум тво́й, я́ко пи́щею, пита́вый, ни-
коли́же пра́здности предава́яйся, ра́дости испо́лнен бы ́ л еси́ и благодаре́ния,
я́ко сподо́би тя́ Госпо́дь потерпе́ти ско́рби от у́ст клеветни́ческих и та́ко дарова́
ти вре́мя уедине́ния. Те́мже, кро́тость и вели́чие ду́ха твоего́ сла́вяще, велича́ем
тя словесы ́ таковы ́ ми:
Ра́дуйся, па́стырю благи́й и любвеоби́льный.
Ра́дуйся, христиа́нский учи́телю, ду́хом си́льный.
Ра́дуйся, клеветы ́ со смире́нием прия́вый.
Ра́дуйся, поноше́ния неви́нно с кро́тостию терпе́вый.
Ра́дуйся, благоче́стия труда́ми пра́вду Бо́жию взыска́вый.
Ра́дуйся, бесе́ды со Стефа́ном испове́дником се́рдце свое́ утеша́вый.
Ра́дуйся, служе́ние свое́ благогове́йно соверша́вый.
Ра́дуйся, мо́щи иера́рха Дании́ла погребе́нию че́стно преда́вый.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 5
Ве́рный па́стырю Це́ркве Христо́вы, кро́тостию бога́т сы ́ й, преди́вный о́тче
Иерофе́е, те́мже смире́нно во́лю Бо́жию прия́л еси́ — кре́ст настоя́тельский
Де́рманския оби́тели, ю ́ же, я́ко иску́сный строи́тель, обнови́л еси́ и сла́вно
украси́л еси́ забо́тою о́тчею. Сия́ оби́тель, я́ко фе́никс из пе́пла, восста́, в не́йже,
любо́вию твое́ю согрева́емии, благода́рне вопие́м Бо́гу: Аллилу́иа.
Икос 5
А ́ нгельский нра́в твой, свя́те, виде́вше, позна́ху тя лю ́ дие отца́, любо́вию пре-
испо́лненнаго, духо́вныя о́чи твоя́ к не́бу вознося́ща, ко Христу́ моля́щася
неуста́нно. Оба́че, ду́хом на Небесе́х пребыва́юще, оби́тель, я́же в Де́рмани, по-
пече́нием свои́м не оста́вил еси́, иде́же не то́кмо духо́вное учи́лище основа́л
еси́, свети́льники благоче́стия возжига́юще, но и зна́ния твоя́ к ну́ждам
церко́вным обрати́л еси́, прему́дре. Те́мже, вои́стину тя па́стыря до́бра и
свети́ло ра́зума почита́юще, прино́сим ти такова́я:
Ра́дуйся, апо́стольскаго преда́ния ве́рный храни́телю.
Ра́дуйся, па́стырскаго до́лга непоколеби́мый исполни́телю.
Ра́дуйся, оби́телей благогове́йный возобнови́телю.
Ра́дуйся, мона́шескаго воздержа́ния преди́вный учи́телю.
Ра́дуйся, Бо́жия благода́ти ди́вный таи́нниче.
Ра́дуйся, Це́ркви неусыпа́емый подви́жниче.
Ра́дуйся, Правосла́вия кре́пкий побо́рниче.
Ра́дуйся, на ни́ве Христо́вей му́дрый рабо́тниче.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 6
Любо́вию удовли́ восхваля́ти тя, я́ко богодарова́ннаго па́стыря и учи́теля
на́шего, про́поведь бо ве́ры христиа́нския бы ́ сть само́ житие́ твое́, досточу́дне
о́тче Иерофе́е. Жи́тельствовал еси́, свяще́нне, во всяком благоче́стии и чистоте́,
крото́стию и незло́бием преиспо́лненный, сосу́д благода́ти Ду́ха Свята́го сый,
тщесла́вия тлетво́рнаго чу́ждый, непоколеби́мо ве́ровал еси́ в Про́мысл всеб-
лага́го Бо́га, взыва́я к Тому́: Аллилу́иа.
Икос 6
И ́ маши на Небесе́х сокро́вище неиждива́емое, святи́телю Христо́в, я́ко звезда́
пресве́тлая возсия́вый во оте́честве твое́м, лю ́ ди твоя́ в Правосла́вней ве́ре и
благоче́стии утвержда́л еси́, е́ресь же лати́нскую и раско́льническая шата́ния
искореня́л еси́ мече́м сло́ва Бо́жия. Те́мже и просла́ви тя Госпо́дь да́ры Ду́ха
Свята́го, и́миже и потруди́лся еси́ во сла́ву Го́спода. Дивя́щеся Бо́жию произ-
воле́нию о тебе́, велегла́сно глаго́лем ти похвалы ́ сицева́я:
Ра́дуйся, чистоты ́ душе́вныя и теле́сныя рачи́телю.
Ра́дуйся, еще́ от мла́дости любому́дрия стяжа́телю.
Ра́дуйся, боле́зней неисце́льных ди́вный цели́телю.
Ра́дуйся, о благи́х Небе́сных вы ́ ну помышля́яй.
Ра́дуйся, скорбя́щим ве́лие утеше́ние подава́яй.
Ра́дуйся, незло́бием твои́м жестокосе́рдых умягча́яй.
Ра́дуйся, согреша́ющих лицо́м к лицу́ с любо́вию облича́яй.
Ра́дуйся, си́х бра́тий без сты ́ да и поноше́ния та́йно отпуска́яй.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 7
Моли́твенниче те́плый, свяще́нне о́тче Иерофе́е, хотя́ все́м се́рдцем твои́м
еди́ному Го́споду рабо́тати, себе́ нивочто́же вмени́л еси́, труды ́ к трудо́м в
кро́тости и смиренному́дрии прилага́я, посто́м же и бде́нием пло́ть свою ́
умертви́в, дерзнове́ние в моли́тве стяжа́л еси́, все́х призыва́я правосла́вно ве-
лича́ти Бо́га, в Тро́ице Еди́наго, и воспева́ти Ему́: Аллилу́иа.
Икос 7
Любо́вию те́плою мно́гия упа́сл еси́ ко спасе́нию, но́вый засту́пниче и
моли́твенниче, его́же показа́ нам гре́шным Госпо́дь, ве́ры Правосла́вныя
честны ́ й защи́тниче, и́стины му́дрый побо́рниче, слове́сных ове́ц ста́да Хри-
сто́ва до́брый па́стырю, заблу́ждших ду́ш ре́вностный взыска́телю, ди́вне о́тче
на́ш Иерофе́е, вои́стинну досто́ин еси́ благохвале́ний тако́вых:
Ра́дуйся, свети́льниче ве́ры, горя́й и светя́й.
Ра́дуйся, тьму́ грехо́вную просвеща́яй.
Ра́дуйся, виногра́да Христо́ва ве́рный де́лателю.
Ра́дуйся, за нас пред Бо́гом усе́рдный предста́телю.
Ра́дуйся, ми́ра Христо́ва благосе́рдый пода́телю.
Ра́дуйся, у́нии зловре́дныя сла́вный посрами́телю.
Ра́дуйся, всеце́лое послуша́ние архипа́стырем стяжа́вый.
Ра́дуйся, благочи́нно служе́ние свое́ соверша́вый.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 8
Юже все́м се́рдцем возлю ́ бил еси́, оби́тель Де́рманскую обнови́л и благо-
украси́л еси́, достоблаже́нне о́тче Иерофе́е, а́ще и стра́нника помышля́л еси́
себе́ бы ́ ти в ми́ре се́м. Оба́че не оста́ви Госпо́дь преподо́бнаго Своего́,
утеше́ние ти даде́ в ме́сте сем святе́м, сего́ ра́ди возвесели́ся ду́х твой. Ны ́ не
же во Иерусали́ме Небе́снем пребыва́юще, сла́дце воспева́еши Бо́гови
пе́снь: Аллилу́иа.
Икос 8
Бы ́ л еси́ все́м вся́, да мно́гия ко Христу́ приведе́ши, сего́ ра́ди поста́ви тя
Госпо́дь святи́телем Це́ркве Святы ́ я. Те́мже, епи́скопом быв, пропове́дал еси́
сло́во, наста́влял еси́ благовре́менне и безвре́менне, облича́л, запреща́л, уве-
щава́л еси́ со вся́ким долготерпе́нием и уче́нием и ве́лиею забо́тою оте́ческою.
По преставле́нии же твое́м стека́хуся к тебе́ от все́х конце́в в преде́лы земли́
Волы ́ нския моще́м твои́м честны ́ м моли́твенно поклони́тися. При́зри и на на́ша
моле́ния, богопоста́вленный иера́рше, и восхвали́ти Го́спода на́м помози́, да
благода́рно зове́м ти́:
Ра́дуйся, пресви́теров Ду́хом Бо́жиим поставля́вый.
Ра́дуйся, стоя́ти во И ́ стине и благоче́стии наставля́вый.
Ра́дуйся, в беда́х и напа́стех по́мощи ско́рый пода́телю.
Ра́дуйся, о все́х притека́ющих к тебе́ ве́рный предста́телю.
Ра́дуйся, дара́ми Ду́ха Свята́го ще́дро обогаще́нный.
Ра́дуйся, вся́каго бли́жняго потре́бы, я́ко своя́ прие́мый.
Ра́дуйся, си́рым и убо́гим в ну́ждах явля́яй заступле́ние.
Ра́дуйся, о су́щих в заточе́нии любо́вию име́вый попече́ние.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 9
Освяще́нный от Бо́га о́тче Иерофе́е, вся́кое естество́ удиви́л еси́, еди́наго бо
Бо́га возлюби́в, взыска́л еси́ Того́ равноа́нгельным житие́м твои́м, ско́рби и
труды ́ в жи́зни, и боле́знь в ста́рости твое́й му́жественне поне́сл еси,
стра́нствие земно́е до́бре соверши́л еси́, те́мже блаже́нныя кончи́ны сподо́би-
выйся, на Небесе́х блаже́нства ра́йскаго наслажда́ешися и воспева́еши Пре-
святе́й Тро́ице: Аллилу́иа.
Икос 9
Вити́ям многовеща́нным не довле́ет слове́с, во е́же изрещи́ вся́ по́двиги и труды ́
твоя́, сла́вне святи́телю Иерофе́е, во сла́ву Го́спода тобо́ю сотворе́нныя. Те́мже
умиле́нием и благодаре́нием испо́лня́ются сердца́ ве́рных, во оби́тели,
возлю ́ бленней тобо́ю, с моли́твами к ра́це моще́й твои́х припа́дающих и бого-
уго́дное житие́ твое́ восхваля́юще пе́нии таковы ́ ми:
Ра́дуйся, благоче́стия вода́ми жа́ждущия спасе́ния напои́вый.
Ра́дуйся, све́том му́дрости и Богопозна́ния ве́рныя просвети́вый.
Ра́дуйся, сооте́чественнику твоему́ Инноке́нтию святи́телю подража́вый.
Ра́дуйся, домо́вый хра́м в честь уго́дника сего́ освяти́вый.
Ра́дуйся, в земном жити́и твое́м сего́ благогове́йно почита́вый.
Ра́дуйся, благода́ть чудотворе́ний по кончи́не свое́й стяжа́вый.
Ра́дуйся, со Христо́м соедини́выйся.
Ра́дуйся, я́ко на́ш те́плый хода́тай пред Бо́гом яви́выйся.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 10
Име́я спасе́ния наде́жду несумне́нну, уго́дниче Бо́жий Иерофе́е, во дни́ ра́дости
Пасха́льныя святы ́ я слу́жбы во оби́тели Де́рманской соверши́л еси́, не́мощь
ста́рческую превозмога́юще, и зде́, напу́тствован Святы ́ ми Та́йнами бы ́ в, почи́л
еси о Го́споде кончи́ною пра́ведною и свято́ю, е́юже мно́г пла́чь земли́
Волы ́ нстей сотвори́л еси. Оба́че ве́руем, я́ко неразлу́чен с на́ми, свя́те, ду́хом
твои́м пребыва́еши, и вы ́ ну мо́лишися Бо́гу о воспева́ющих Ему́ пе́снь: Ал-
лилу́иа.
Икос 10
Юных сла́вный во благоче́стии наста́вниче, учи́лищ христиа́нских основа́телю
и покрови́телю, ди́вне о́тче Иерофе́е, стена́ бы ́ в при жи́зни всем приходя́щим к
тебе́, и по сме́рти ны ́ не оставля́еши твои́м заступлением. Ду́хом ны ́ не пре-
быва́яй у Престо́ла Вы ́ шняго, за все́х, ве́рою и любо́вию моля́щихся, те́пле
предста́тельствуеши, по́мощь же неоску́дную от Бо́га подае́ши. Тебе́ бо, я́ко
усе́рдному засту́пнику о душа́х на́ших, благода́рственно пое́м сицева́я:
Ра́дуйся, яко на Христо́вей ни́ве изря́дно потруди́выйся.
Ра́дуйся, по́двигами усе́рдными Христа́ ра́ди подвиза́выйся.
Ра́дуйся, лозо́ Це́ркве неувяда́емая, мно́г пло́д прине́сшая.
Ра́дуйся, кади́льнице злата́я, фимиа́м моли́твы к Бо́гу вознося́щая.
Ра́дуйся, от лет ра́нних Бо́га всем се́рдцем возлюби́вый.
Ра́дуйся, ве́рен Тому́ до конца́ дни́й твои́х пребы ́ вый.
Ра́дуйся, жи́знию твое́ю безразде́льно Го́сподеви послужи́вый.
Ра́дуйся, по преставле́нии Ца́рствие Небе́сное унасле́довавый.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 11
Че́ствует тя Це́рковь на земли́ и велича́ет пе́нием моле́бным, святи́телю о́тче
Иерофе́е, Це́рковь же Небе́сная ны ́ не тобо́ю украша́ется. Мы ́ же, немощни́и,
пе́ния похва́льная прино́сим ти́, уго́дниче Христо́в. Не отри́ни ма́лое моле́ние
нас, недосто́йных ча́д твои́х, святы ́ я мо́щи твоя́ [святу́ю ико́ну твою ́ ] благо-
гове́йно лобыза́ющих и со умиле́нием благода́рно пою ́ щих Бо́гу: Аллилу́иа.
Икос 11
Истиннаго Све́та светоза́рный свети́льник су́щим на земли́ явля́ешися,
святи́телю о́тче Иерофе́е, сердца́ бо ве́рных просвеща́еши и к ра́зуму
Боже́ственному вся́ наставля́еши, ра́зумом бога́т сы ́ й и му́дростию Ева́нгелия
нетле́нною оболче́н. Смотре́нием Бо́жиим восхоте́л еси́ после́дняя своя́ в
Де́рмани пожи́ти, сего́ ра́ди духо́вно украси́ся свята́я оби́тель сия́, иде́же с
моли́твою серде́чною припа́даем к моще́м твои́м многоцеле́бным и со слеза́ми
взыва́ем ти́ такова́я:
Ра́дуйся, благода́ти Свята́го Ду́ха чи́стый стяжа́телю.
Ра́дуйся, духо́внаго би́сера слове́снаго раздая́телю.
Ра́дуйся, о всех тебе с ве́рою моля́щихся приле́жный попечи́телю.
Ра́дуйся, боле́знующих душе́ю и те́лом ми́лостивый цели́телю.
Ра́дуйся, оби́телей и хра́мов Бо́жиих смотри́телю.
Ра́дуйся, ве́ры правосла́вныя тве́рдый храни́телю.
Ра́дуйся, все́м в беда́х и напа́стех су́щим до́брый помо́щниче.
Ра́дуйся, обремене́нных и озло́бленных ско́рый побо́рниче.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 12
Сокро́вище благода́ти Бо́жия суть святы ́ я и нетле́нныя мо́щи твоя́, Иерофе́е,
о́тче на́ш, от ни́хже си́лою Бо́жиею излия́ся чуде́са па́че песка́ морска́го.
Ве́руем, свя́тче, я́ко ты ны ́ не с на́ми еси́, я́коже и пре́жде, и моли́твами твои́ми
сохраня́еши нас от вся́каго зла́. Те́мже покланя́ющеся ме́сту свято́му, на не́мже
святы ́ ня телесе́ твоего́ че́стно почива́ет, пое́м Бо́гу: Аллилу́ия.
Икос 12
Твое́ воспева́ем богоуго́дное житие́ и мно́гая пресла́вная, я́же в нем бы ́ вшая,
святи́телю о́тче на́ш Иерофе́е, ублажа́ем труды ́ твоя́, и́миже во сла́ву Бо́жию
порабо́тал еси́, восхваля́ем любому́дрие твое́, почита́ем па́стырскую кро́тость
и смире́ние нелицеме́рное твое́. Мо́лим тя́: не возгнуша́йся на́ших недо-
сто́йных похва́л, и́миже тя́ от усе́рдия на́шего че́ствовати дерза́ем, но прик-
лони́ся ми́лостивно к зову́щим ти всеусе́рдно хвале́ния такова́я:
Ра́дуйся, красото́ Волы ́ нския земли́ неувяда́емая.
Ра́дуйся, сокро́вищнице благода́ти неисчерпа́емая.
Ра́дуйся, па́стырю благи́й, кро́ткий и смире́нный.
Ра́дуйся, таи́нниче Небе́сныя благода́ти благослове́нный.
Ра́дуйся, покро́вом моли́тв па́ству твою ́ при́сно соблюда́яй.
Ра́дуйся, достоя́ние твое́ оте́чески всегда́ назира́яй.
Ра́дуйся, по Бо́зе и Богоро́дице кре́пкое на́ше упова́ние.
Ра́дуйся, Правосла́вныя Це́ркве боголе́пное украше́ние.
Ра́дуйся, святи́телю о́тче Иерофе́е, оби́тели Де́рманския похвало́ и земли́
Волы ́ нския в Правосла́вии утвержде́ние.
Конда́к 13
О пресла́вный святи́телю Христо́в, богоно́сне о́тче на́ш Иерофе́е! Во умиле́нии
тебе́ предстоя́щих не пре́зри, но твои́м предста́тельством сохра́ни оби́тель твою ́ от вра́г ви́димых и неви́димых, и благода́тную по́мощь твою ́ низпосли́ бого-
уго́дно подвиза́ющимся в ней. Всем же, на моле́бное поклоне́ние к тебе́ при-
тека́ющим, и во всем ми́ре в моли́твах тя призыва́ющим, благослове́ние оте́че-
ское пода́ждь тече́ние жи́зни во вся́ком благоче́стии и чистоте́ соверши́ти, Хри-
ста́ Бо́га ве́рно и небоя́зненно испове́дующе, да с тобо́ю вку́пе и все́ми святы ́ ми
пое́м Ему́: Аллилу́иа.
Сей конда́к чте́тся три́жды, зате́м 1-й и́кос и 1-й конда́к.
Молитва первая
О свети́льниче пресве́тлый земли́ Волы ́ нския, вели́кий во иера́рсех святи́телю
Христо́в Иерофе́е, ра́зумом, просвеще́нным от Го́спода испо́лнен бы ́ в, бо-
гому́дре, Ду́ха Всесвята́го труба́ златослове́сная яви́лся еси́, мно́гая и
разли́чная дарова́ния от Го́спода прия́л еси́, и, я́ко ра́б благи́й и ве́рный, вся
тала́нты, тебе́ да́нныя, приумно́жил еси́, и́миже Це́ркви Христо́вей и Оте́честву
на́шему сла́вне послужи́л еси́, ны ́ не же ве́лие и́маши ко Святе́й Тро́ице дерз-
нове́ние. Сего́ ра́ди к тебе́ прибега́ем и, припа́дающе к честно́му о́бразу твоему́
[или: к святы ́ м моще́м твои́м], про́сим: при́зри ми́лостивно на нас, гре́шных,
любо́вию почита́ющих святу́ю па́мять твою ́ ; яви́ ве́лие милосе́рдие твое́ к нам,
и вознеси́ о па́стве твое́й те́плыя моли́твы ко Го́споду, да благода́тию Свое́ю
покры ́ ет и сохрани́т от вся́каго зла́ Де́рманскую оби́тель Пресвяты ́ я Тро́ицы,
сесте́р, зде́ спасе́ния взыску́ющих и всех, на поклоне́ние моли́твенное в ню
приходя́щих, и щедро́ты ве́лия пода́ст лю ́ дем Свои́м. Воззри́ ми́лостивно, о́тче
достосла́вне, от Го́рних высо́т на на́с, немощны ́ х, греха́ми мно́гими обре-
мене́нных, и умоли́ Го́спода Вседержи́теля, да отврати́т от нас гне́в Сво́й,
пра́ведно на ны ́ дви́жимый, и на путь покая́ния нас обрати́т; прельще́ние язы ́ че-
ское, зловре́дное нече́стие, раско́лы и е́реси да истреби́т, от собла́знов же ми́ра
и ко́зней диа́вольских нас огради́т. Ей, кре́пкий сто́лпе церко́вный, сосу́де бла-
года́ти предъизбра́нный, испроси́ от Отца́ све́тов, да от неве́рия и суеве́рия нас
изба́вит, в ве́ре спаси́тельной Правосла́вной ве́рныя утверди́т, неве́рныя к по-
зна́нию Истины да обрати́т, па́стырем Це́ркве пра́ведность и ре́вность о
спасе́нии да пода́ст, мона́шествующих в по́двизе укрепи́т, ми́р умири́т и зе́млю
на́шу от крамолы ́ и нестрое́ний свободи́т. О, предста́телю те́плый и чудотво́рче
преди́вный, о́тче наш Иерофе́е, исхода́тайствуй нам у Го́спода Бо́га здра́вие
душе́вное и теле́сное, вре́мя на покая́ние и исправле́ние; ми́рное и без-
мяте́жное житие́, и во все́х ну́ждах, ско́рбех и искуше́ниях утеше́ние и ско́рое
поможе́ние. Да та́ко сподо́бимся насле́дницы бы ́ ти Ца́рствия Небе́снаго, иде́же
просла́вим вку́пе с тобо́ю всех благи́х Пода́теля, Триеди́наго Бо́га, Отца́ и Сы ́ на
и Свята́го Ду́ха, ны ́ не и при́сно и во ве́ки веко́в. Ами́нь.
Молитва вторая
О до́брый па́стырю и сла́вный учи́телю, ско́рый помо́щниче и те́плый за-
сту́пниче, земли́ Волы ́ нския духо́вное прозябе́ние, богоблаже́нный уго́дниче
Бо́жий, досточу́дный о́тче наш Иерофе́е! Име́яй ве́лие дерзнове́ние пред Пре-
сто́лом Всевы ́ шняго, не оста́ви моли́твами твои́ми нас, с любо́вию и ве́рою к
тебе́ притека́ющих. Ты бо от лет ю ́ ных о́гнь любве́ Боже́ственныя в се́рдце
твое́м ко Го́споду возже́гл еси́, жи́знь свою ́ Бо́гу всеце́ло посвяти́вый, наипа́че
ра́зум глубо́кий и му́дрость пресла́вную обреты ́ й, нищету́ же духо́вную
стяжа́вый, я́ко раб благи́й, дела́ богоуго́дная кро́тко и смире́нно твори́л еси́,
те́мже и надели́ тя Госпо́дь да́ры Ду́ха Свята́го, и́миже и поны ́ не то́чиши чудеса́
мно́гая. Ей, ди́вне святи́телю о́тче Иерофе́е! Мо́лим тя приле́жно, при́зри на
лю ́ ди, зде предстоя́щия, и благода́тию, Бо́гом ти да́нною, мона́шествующих в
по́двизех укрепи́, ду́ши на́ша, грехо́м изъя́звленныя, уврачу́й, телеса́ на́ша мно-
гоболе́зненная исцели́, ю ́ ных уцелому́дри, ста́рость поддержи́, си́рых и
обездо́ленных окорми́, супру́жества ве́рно сохрани́. Научи́ ны воспита́ние
до́брое подава́ти ча́дам на́шим в ве́ре Правосла́вней, да не уклони́мся от
И ́ стины, но тве́рдо Христа́ Бо́га испове́дуем. Моли́ Всеблага́го Бо́га, да
утверди́т в Правосла́вии оте́чество на́ше, нам же да́рует покая́ние и́стинное,
любо́вь и братолю ́ бие нелицеме́рное, да еди́ными усты ́ и еди́ным се́рдцем
сла́вим и воспева́ем всечестно́е и великоле́пое и́мя Отца́ и Сы ́ на, и Свята́го
Ду́ха, ны ́ не и при́сно, и во ве́ки веко́в. Ами́нь.
Молитва краткая
О богому́дре о́тче на́ш Иерофе́е, святи́телей сла́вное украше́ние, смире́нно во-
пие́м ти: не оста́ви нас, чад свои́х, но бу́ди всегда́ с на́ми. Пода́ждь на́м
спасе́ние и жи́знь ве́чную, шата́ния ерети́ческая и раско́льников де́рзости
пла́мя угаси́, да́руй здра́вие, низпосли́ благорастворе́ние возду́хов и изоби́лие
плодо́в земны ́ х. Просвети́, богому́дре, о́чи на́ша, да пле́на грехо́внаго избе́гнем.
Посети́, свя́те, не́мощь на́шу, вразуми́ и напра́ви ны ́ на стези́ пра́вды, да не от-
паде́м от любве́ Бо́жия. Ве́руем, я́ко николи́же престае́т моли́тва твоя́, сего́ ра́ди
по до́лгу пое́м, блажи́м тя и сла́вим, и досто́йную пе́снь прино́сим ти, вопию ́ ще
и глаго́люще: тебе́ ублажа́ем, святи́телю; тебе́ воспева́ем, свети́льниче; тебе́
моле́бно покланя́емся, о́тче Иерофе́е! Моли́ся в Тро́ице Сла́вимому Бо́гу о всех,
пою ́ щих святу́ю твою ́ па́мять, да сподо́бятся купно с тобо́ю ве́чно сла́вити
Отца́, и Сы ́ на, и Свята́го Ду́ха. Ами́нь.
