Кондак 1
Избрании служителие Божии и всехвальнии мученицы Христови, всю мира сего суету презревшии любве ради ко Христу, Сыну Божию, и живот свой положившии, яко жертву непорочную и чистую, паче желая прияти мучения и смерть, неже отрещися Бога Истинного, восхваляем вы любовию, святии Адриане и Наталие! Вы же, в веселии предстояще престолу славы Господни и выну наслаждающеся Того лицезрением, молитеся о нас, грешных, с верою и благоговением к вама притекающих, да благодарственно вопием вама: Радуйтеся, святии Адриане и Наталие, мученицы Христови всехвальнии и страдальцы непобедимии!
Икос 1
Ангельскою ко Господу горящи любовию, непрестанно возсылала еси усердныя молитвы к Богу Спасителю твоему, Наталие всеблаженная, да просветит лучем Своея благодати помраченное сердце супруга твоего и обратит е к познанию Его, Творца и Владыки твоего, дондеже Царь царей услыша слезныя прошения твоя и коснуся сердца Адрианова, и абие уверова супруг твой от всея души, и бодренным сердцем претерпе лютейшия муки, и самую смерть за Христа не убояся прияти. Темже благоговейно удивляющейся вашей ко Христу любви и ревности по Бозе, радостно вама взываем:
Радуйтеся, светильницы всесветлии, горящии любовию Божественною; радуйтеся, столпи непоколебимии противу озлоблений идолослужителей нечестивых.
Радуйтеся, Крест Христов с терпением и преданностию понесши;
радуйтеся, сим победы святыя знамением диавола победившии и его козни посрамившии.
Радуйтеся, нетления венцы восприявшии и славою от Господа венчании;
радуйтеся, яко ныне на Небеси предстоите Престолу Вседержителеву и молитеся за ны, грешныя.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 2
Видя, Господь чистоту сердца твоего, Адриане всечестне, аще и помраченнаго тьмою многобожия, обаче готоваго прияти Истину, благоволи призвати тя в чудный свет Свой и открыти тебе двери Царствия Своего, молитвами святыя супружницы твоея, с нею же в веселии взывал еси Триединому Богу, просветившему твою душу, хвалебную песнь: Аллилуиа.
Икос 2
Разум истинного боговедения внезапу объя душу твою, Адриане, егда, по повелению цареву вписывал еси с прочими нотарии имена святых мученик, на страдание и смерть за имя Христово ведомых, егда бо вопросил еси служителей Господних, кое воздаяние имут прияти от Господа во царствии Его за вся муки, тии отвещаша ти, яко несть мощно бренному языку изрещи и уму слабому постигнути, яже уготова Бог любящим его. Ты же, абие оставль все идольское зловерие, всем сердцем ко Христу устремился еси и возопил еси дерзновенно: «И аз христианин есмь!». Почитающе убо твое обращение ко истинному Солнцу Правды молим тя, приими вкупе с супружницею твоею, святою Наталиею, от нас, грешных, похвалы сицевыя:
Радуйтеся, Истинного Бога святии служителие;
радуйтеся, Того воли ревностнии исполнителие.
Радуйтеся, яко вся красная и сладкая мира сего любве ради Христовы презрели есте;
радуйтеся, яко любовь земную и супружеское счастие в жертву Возлюбившему вы принесли есте.
Радуйтеся, научающии нас не прилеплятися к земным благам, но возноситися духом горе к Богу;
радуйтеся, немощь нашу просвещающии и восходити на лествицу святыни нам помогающии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 3
Силою свыше укрепленный, шествовал еси, блаженне, мужественно на предлежащий ти подвиг, жаждая умрети за возлюбленнаго Спасителя и Бога твоего. Супружница же твоя, святая Наталия, молитвами и увещании помогаше ти подъяти крест, от Господа тебе посылаемый и прияти венец нетления, уготованный ти на небесех, и дерзновенно Богу воспевати: Аллилуиа.
Икос 3
Имеяй изыти на беззаконное судище Максимианово, затворен был еси в темницу мрачную, идеже с прочими святыми мученики всю нощь в молитвах, песнопениих и беседах духовных провел еси. Любвеобильная же супружница твоя, немощь женскую презревши и естественную любовь плотскую ни во чтоже вменивши, всячески тя убеждаше не отступати от веры Христовы, но до конца пребыти неколеблемым исповедником имене Иисусова и не боятися смерти. Темже вама, яко истинным воином Христовым, в духовном веселии взываем:
Радуйтеся, правоверия мужественнии ревнителие;
радуйтеся, зловерия неустрашимии обличителие.
Радуйтеся, терпением, яко крепкою бронею облекшиися;
радуйтеся, Крест Христов яко непобедимое оружие в руце приемшии.
Радуйтеся, яко беззаконных мучителей преестественным мужеством вашима удивили есте;
радуйтеся, яко вама имя Божие прославися.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 4
Бурю малодушия и боязни от сердца твоего отгоняющи, славне Адриане, и на предлежащий мученический подвиг тя укрепляющи, блаженная, жена твоя, Наталия, всю нощь не преставаше с тобою беседовати о чуднем и велицем воздаянии, еже уготова Бог за Него живот свой положившим, и тако вещаше тебе: «Блажен еси, господине мой; яко обрел еси сокровище безценное, драгоценный бисер-Христа Господа твоего! Не отступай паки во тьму идольскую, но выну пребывай верен Возлюбльшему тя, вопия Ему от всего сердца: Аллилуиа.
Икос 4
Слыша святая Наталиа, в дому своем седящая, яко грядеши к ней из темницы, и возмневши, яко мук убоялся еси и отврглся еси Христа, плакася горько и предтекши тебе из дверей дома, нача укоряти тя, почто от веры Христовы отступил еси. Ты же, радуяся духом и паче укрепляяся на страдания, со слезами ей поведал еси, яко не токмо не отступил еси от Христа, но паче желаеши за имя Его Святое страдати. Таковей высоте любве христианския удивляющееся, со умилением вама взываем:
Радуйтеся, образ истинный супружества христианского явившии;
радуйтеся, любовь небесную в себе поистине показавшии.
Радуйтеся, на подвиг самоотвержения Христа ради, нас одушевляющии;
радуйтеся, вся красная мира сего преходящаго презирати нас научающии.
Радуйтеся, дольняя оставляти и духом взлетати к горним нас увещевающии;
Радуйтеся, во всех, бываемых с нами, волю Божию зрети нам помогающии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 5
Чудное милосердие и любовь показующи, о Наталие, припадала еси к ногам узников, в темнице вкупе с мужем твоим за имя Христово заключенных, и священныя язвы их лобызающи, отирала еси гной их, облегчение и отраду всячески им содевая и в сердечнем умилении к Богу Небесному вопиющи ангельскую песнь: Аллилуиа.
Икос 5
Узрев мучитель злочестивый узники святыя, в темнице с тобою затворенныя, толикаго от ран изнеможения достигшия, яко отнюдь, не мощи им претерпети лютейшия муки, повеле единаго тя, Адриане, привести пред судище свое и всячески тя увещеваше отрещися Христа, устрашая тя предлежащими муками. Обаче Свыше укрепляемый и блаженною супругою утешаемый, пребыл еси тверд, аки адамант, противу искушения вражескаго. Сего ради твое за Христа страдание любовию ублажающе и святую супружницу твою величающе, радостно вама, взываем:
Радуйтеся, Бога Вышняго победоноснии служителие;
радуйтеся, веры Христовы громогласнии исповедницы.
Радуйтеся, идольския прелести дерзновеннии обличителие;
радуйтеся, Славы Божии неустрашимии проповедателие.
Радуйтеся, Максимианова гнева не убоявшиися;
радуйтеся, того ярость ни во чтоже вменившии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 6
Проповедник велегласный явился еси, Адриане, егда, предстоя судищу цареву, небоязненно исповедывал еси Христа быти Бога Истинного, сотворшаго небо и землю, идольскую же прелесть обличил еси, и за сие исповедание и обличение жесточайшее биение подъял еси, к Подвигоположнику твоему вопия: Аллилуиа.
Икос 6
Свет славы Небесныя осия лице твое, мудрый страдальче, егда по чреву биемый, яко и утробе твоей излиятися от жестоких ударов, не преставал еси славити Христа и пред всем народом имя Его Святое исповедовати. Блаженная же Наталиа радовашеся духом, зрящи терпение твое и мужество, и молитвенно тя укрепляше, да не изнеможет душа твоя и да пребудеши до конца верный служитель Христов, ей же вкупе с тобою мы, грешнии, воспеваем сице:
Радуйтеся, Духа Святого священная жилища;
радуйтеся, благодати Христовы славная вместилища.
Радуйтеся, душевно светом Божественным осияваемии;
радйтеся, от Христа Царя свыше просвещаемии.
Радуйтеся, силою Божества Его укрепляемии;
радуйтеся, на подвиг страдания небоязненно шествовавшии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 7
Хотя царь злочестивый паки тя призвати на судище, славне Адриане, в темницу тя затвори с прочими святыми мученики, идеже приступи к тебе Наталиа святая и нача терпение твое ублажати и укрепляти тя, глаголющи: «Блажен еси, господине мой, яко сподобился еси части святых мучеников Христовых!». С неюже радуяся, Богу взывал еси: Аллилуиа.
Икос 7
Новую кознь измышляя мучитель злый, повеле воем своим отнюд не впускати в темницу к узником жен, из града приходящих утешения ради и облегчения страдальцев Христовых. Тогда и тебе, святая Наталие, возбранено бысть мужа твоего видети и служити ему; обаче повеление царево небрегши, в мужеском одеянии в темницу приходила еси и якоже прежде святого супруга твоего подкрепляла еси, да мужественно грядет на мучения и смерть за Христа Господа. Сего ради достойно восхваляем тя вкупе со святым мужем твоим и сице вама вопием:
Радуйтеся, служителей Христовых украшение пресветлое;
радуйтеся, исповедников имене Иисусова велелепная славо.
Радуйтеся, путь узкий возлюбльшии и нам его указующии;
радуйтеся, яко путем сим тихаго пристанища, Царствия Христова, достигосте.
Радуйтеся, яко ныне в славе и блаженстве нескончаемем пребываете; радуйтеся, яко нас молитвами вашими от бед и напастей сохраняете. Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 8
Странное и чудное зримо бысть в темнице, идеже заключен был еси, Адриане, с прочими страдальцы Христовыми, егда по повелению грознаго мучителя голени твои сокрушати хотяху. Тогда бо святая жена твоя сама подъя нозе твои и положи их на наковальню, да пребиются от рук мучительских, и ты скорее соединишися с Господем твоим, воспевая непрестанно Ему: Аллилуиа.
Икос 8
Весь горя любовию ко Христу, мучениче Адриане, в терпении пребыл еси до самыя блаженныя кончины твоея, егда чистая душа твоя с Господем соединися, за Егоже имя толико страдал еси, яко и руце твоей отсеченней быти. Почитающе убо твою мученическую кончину, верою тебе и святей Наталии взываем:
Радуйтеся, душевные муки вкупе с телесными за Христа претерпевшии;
радуйтеся, крилами небесныя любве горе к Богу возлетевшии.
Радуйтеся, яко орли, к Солнцу Правды воспарившии;
радуйтеся, к Свету Невечернему из юдоли плача возвысившиися.
Радуйтеся, в сонме святых мученик водворившиися;
радуйтеся, вкупе со всеми святыми на Небесех чудную песнь Боту воспевающии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 9
Вся гордыня мучителя безчеловечнаго посрамлена бысть, егда сильный дождь погаси пламень огненный и не допусти сгорети честным останком святых мученик Христовых, еще же и град весть потоплен бысть водою, и люди нечестивии громом и молниею устрашени быша. Ты же, блаженная Наталиа, в веселии воспевала еси Христу, вся благоустрояющему: Аллилуиа.
Икос 9
Витийство похвал земных не довлеет ко восхвалению подвигов ваших, святии мученицы Христови Адриане и Наталие, ов убо о временней славе и величии земном небрег, вся остави и положи душу свою за веру во Христа, ова же, естественную женскую немощь преодолевши, мужески подвизася, укрепляющи супруга своего в его мучениих и радующися его блаженней кончине. Толикая деяния ваша достойно восхвалити недоумеюще, с любовию вама взываем:
Радуйтеся, бодренным сердцем Крест Христов на рамо подемшии;
радуйтеся, под тяжестию его не изнемогшии.
Радуйтеся, подражателие Христовых страстей бывшии;
радуйтеся, плоть вашу со страстьми и похотьми распявшии.
Радуйтеся, образ любве и кротости в себе показавшии;
радуйтеся, друг друга тяготы носити нас научившии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 10
Спасти хотя телеса святых мученик от поругания и безчестия, прииде некий благочестивый муж с женою своею ко святей Наталии и прочей братии христианстей, прося их соизволити ему, да возмет с собою в Византию святыя мощи и положит их тамо честно до времене, егда умрет Максимиан злочестивый. Христиане же града Никомидии соизволиша прошению сего мужа и препоручивше ему многоценное сокровище, Богу радостно вопияху: Аллилуиа.
Икос 10
Яко стеною ограждаеми есмы вашима святыми молитвами, святии Адриане и Наталие, се бо во всяких бедах и напастех наших нам всегда помогаете, наипаче же егда память вашу с любовию празднуем и славим о вама Христа Бога нашего. Сохраняемии убо вашима теплыми о нас молитвами, верно восхваляем вы звании сими:
Радуйтеся, о нас к Богу непрестаннии молитвенницы;
радуйтеся, любовию к нам горящии теплии наши помощницы.
Радуйтеся, скории заступницы наши и наставницы;
радуйтеся, учителие наши, жити богоугодно нас научающии.
Радуйтеся, любвеобильнии друзи наши, к немощем нашим снисходящии;
радуйтеся, на высоту девственныя чистоты и безстрастия нас возводящии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 11
Пение Богу от всего сердца приносила еси, блаженная Наталие, егда избави тя из руки трибуна, желавшаго тя себе в жену пояти. Ты бо, яко верная супруга мученика Христова Адриана, не восхотела еси второе посягнути за мужа и с молитвою бежала еси, седши на корабль, в Византию, идеже тело святаго мужа твоего положено бысть. Достигши убо града сего, с любовию взывала еси Господу Богу: Аллилуиа.
Икос 11
Светильник пресветлый явися корабль, на немже морскую пучину преплыла еси, имея с собою многоценный бисер, руку святаго мужа твоего, егоже молитвами преследования трибуна избегнувши, невредимо Византии достигла еси, и с радостною душею лобызающи тело блаженнаго господина твоего, в душевнем умилении душу твою в руце Господни предала еси. Величающе убо твое ко Господу отшествие вкупе с Адрианом святым, воспеваем вы сице:
Радуйтеся, супрузи блаженнии, на земли в любви пожившии и по смерти не разлучившиися;
радуйтеся, ближнии друзи Господни, у Престола Его пребывающии.
Радуйтеся, лицезрением Его всесветлым выну наслаждающиися;
радуйтеся, блаженство вечное всецело вкушающии.
Радуйтеся, в селениих праведных упокоение обретшии;
радуйтеся, на земли святыя мощи своя на исцеление нам оставившии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 12
Благодати исполненнии сосуди показашася честная ваша мощи, Христом Богом нам дарованныя, к нимже усердно притекающе святии мученицы Христови, грехов разрешение молитвами вашима приемлем, всем сердцем вопиюще Богу: Аллилуиа.
Икос 12
Поюще честная ваша страдания и блаженную кончину, еюже взыдосте в Горняя, ко всем святым, от века Богу угодившим, хвалим вы, всеславнии мученицы Христови, Адриане и Наталие, и усердно молим непрестанно поминати у Престола Славы нас, ублажающих вы сице:
Радуйтеся, мученицы прехвальнии и доблии воини Христови;
радуйтеся, непобедимии страстотерпцы и победоносцы славнии.
Радуйтеся, истинныя веры поборницы изряднии;
радуйтеся, добродетелей светильницы неугасимии.
Радуйтеся, углие, любовию Божественною горящии;
радуйтеся, венценосцы, небесными благами от Христа венчаннии.
Радуйтеся, святии Адриане и Наталие, мученицы Христови всехвальнии и страдальцы непобедимии!
Кондак 13
О святии мученицы Христовы, Адриане и Наталие! Услышите нас, усердно вама молящихся и в храм ваш притекающих, и молите милостиваго Владыку Господа нашего Иисуса Христа даровати нам мир и здравие душ и телес, и спасти души наша, да выну поем Ему: Аллилуиа.
(Этот кондак читается трижды, затем икос 1 и кондак 1)
Молитва святым мученикам Адpиану и Наталии
О, священная двоице, св. мученицы Христовы Адриане и Наталие, блаженнии супрузи и добрии страдальцы! Услышите ны, молящиеся вама со слезами, и ниспослите на ны вся благопотребная душам и телесем нашим, и молите Христа Бога, да просветит очи сердечныя к зрению спасения и сотворит с нами по милости Своей, да не погибнем во гресех наших! Ей, святии мученицы, примите глас моления нашего и избавите ны молитвами вашима от глада, губительства, труса, потопа, огня, меча, и междоусобныя брани, от напрасныя смерти и от всех бед, печалей и болезней, супругов во единомыслии соблюдите, юным вашей ревности по Бозе подражати, отпадшия от правоверия паки возвратите, да выну вашима молитвами и предстательством укрепляеми, веру непорочну сохраним и возставше из глубины греховныя прославим о вас Господа Иисуса, чающе вашими богоприятными молитвами сподобитися небесныя блаженныя жизни и непостыдно стати в день судный одесную Христа Бога, Ему же подобает всякая слава, честь и поклонение, со Безначальным Его Отцем и Пресвятым и Благим и Животворящим Духом, ныне и присно и во веки веков. Аминь.
